Num 28 | NdeIBE | STEP | UJehova wathi kuMosi,

Numbers 28

Iminikelo yezinsuku zonke

1 UJehova wathi kuMosi, 2 “Phana abako-Israyeli umlayo lo uthi kubo: ‘Nanzelelani ukuthi lingilethela ngesikhathi esiqanjiweyo ukudla kweminikelo yami eyenziwa ngomlilo, njengoqhatshi olumnandi kimi.’ 3 Tshono uthi kubo: ‘Lo ngumnikelo owenziwe ngomlilo okumele liwuse kuJehova: amazinyane emvu amabili angelasici njalo alomnyaka owodwa ezelwe, kube ngumhlatshelo wokutshiswa wansuku zonke. 4 Lungisani izinyane elilodwa lemvu ekuseni libe selihlaba elinye sekunqunda amehlo, 5 ndawonye lomnikelo wamabele ayisilinganiso sokwetshumi kwehefa yefulawa ecolekileyo exutshaniswe lengxenye yesine yehini yamafutha ahluzwe kuma-oliva. 6 Lo ngumnikelo wokutshiswa wezikhathi zonke owamiswa entabeni yaseSinayi njengoqhatshi olumnandi, umnikelo owenzelwa uJehova ngomlilo. 7 Umnikelo wokunathwayo ozakwenziwa ndawonye lengxenye yesine yehini yokunathwayo okulemvubelo ndawonye lezinyane lemvu. Thela umnikelo wokunathwayo phambi kukaJehova endlini engcwele. 8 Lungisa izinyane lesibili lemvu sekunqunda amehlo, kuhambe kanye kanye lomnikelo ofananayo wamabele lomnikelo wokunathwayo ofanana lalowo owulungise ekuseni. Lo ngumnikelo owenziwe ngomlilo, uqhatshi olumnandi kuJehova.

Iminikelo yeSabatha

9 “ ‘Ngosuku lweSabatha, lungisa umnikelo wamazinyane emvu amabili alomnyaka owodwa ezelwe engelasici, ndawonye lomnikelo wokunathwayo kanye lomnikelo wamabele ozingxenye ezimbili zehefa etshumini zefulawa ecolekileyo exutshaniswe lamafutha.

10 Lo ngumnikelo wokutshiswa kuwo wonke amasabatha, phezu komnikelo wokutshiswa lowokunathwayo ojwayelekileyo.

Iminikelo yenyanga zonke

11 “ ‘Ngosuku lwakuqala inyanga zonke, letha kuJehova umnikelo wokutshiswa wezinkunzi ezingamaguqa ezimbili, inqama eyodwa lamazinyane ezimvu amaduna alomnyaka ezelwe, angelasici. 12 Inkunzi eyodwa izahamba lomnikelo wamabele ozingxenye ezintathu etshumini zehefa yefulawa ecolekileyo exutshaniswe lamafutha; inqama izahamba lomnikelo wamabele ayingxenye ezimbili etshumini zehefa yefulawa ecolelileyo exutshaniswe lamafutha; 13 izinyane lemvu ngalinye lizahamba lomnikelo wamabele oyingxenye eyodwa etshumini lehefa yefulawa ecolekileyo exutshaniswe lamafutha. Lokhu ngokomnikelo wokutshiswa, iphunga elimnandi, umnikelo owenzelwa uJehova ngomlilo. 14 Inkunzi nganye izahamba lomnikelo wokunathwayo okuyingxenye yehini yewayini; lenqama, ingxenye yesithathu yehini; kuthi izinyane lemvu ngalinye lihambe lengxenye yesine yehini. Lo ngumnikelo wokutshiswa owenyanga zonke okumele wenziwe ekuthwaseni kwezinyanga zonke ngomnyaka.

15 Ngaphandle komnikelo wokutshiswa ojwayelekileyo kanye lomnikelo wakhona wokunathwayo, imbuzi enduna eyodwa kumele iphiwe uJehova njengomnikelo wesono.

IPhasika

16 “ ‘Ngosuku lwetshumi lane ngenyanga yakuqala kuzakuba lePhasika likaJehova.

17 Ngosuku lwetshumi lanhlanu lwaleyonyanga kuzakuba ledili; okwezinsuku eziyisikhombisa lizakudla isinkwa esingelamvubelo. 18 Ngosuku lwakuqala lizakuba lombuthano ongcwele njalo lingenzi imisebenzi yenu ejwayelekileyo.

19 Kodwa linikele kuJehova umnikelo owenziwe ngomlilo, umnikelo wokutshiswa owezinkunzi ezingamaguqa ezimbili, inqama eyodwa kanye lamazinyane ezimvu amaduna ayisikhombisa alomnyaka owodwa ezelwe, konke kungelasici.

20 Kuzakuthi inkunzi nganye liyilungise kanye lomnikelo wamabele ayingxenye yokuthathu etshumini lehefa yefulawa ecolekileyo exutshaniswe lamafutha; kuthi inqama ihambe lokubili etshumini; 21 kuthike linye ngalinye izinyane lemvu kwayisikhombisa, lihambe lokukodwa etshumini. 22 Akube khona lembuzi eyodwa enduna ibe ngumnikelo wesono ukuzenzela indlela yokubuyisana. 23 Phezu kwalokho lungisani umnikelo wokutshiswa wekuseni ojwayelekileyo. 24 Ngaleyondlela lungisani ukudla komnikelo owenziwe ngomlilo izinsuku zonke eziyisikhombisa kube luqhatshi olumnandi kuJehova; lokhu kumele kulungiswe kusengezelela umnikelo ojwayelekileyo wokutshiswa kanye lomnikelo wakho wokunathwayo. 25 Ngosuku lwesikhombisa lizakuba lombuthano ongcwele njalo lingenzi imisebenzi yensukwini.

IDili lamaViki

26 “ ‘Ngosuku lwezithelo zakuqala, nxa lisethula kuJehova umnikelo wamabele amatsha ngesikhathi seDili lamaViki, banini lombuthano ongcwele njalo lingenzi imisebenzi yensukwini. 27 Nikelani ngomnikelo wokutshiswa owezinkunzi ezingamaguqa ezimbili, inqama eyodwa kanye lamazinyane amaduna ayisikhombisa awezimvu alomnyaka owodwa ezelwe kube luqhatshi olumnandi kuJehova. 28 Kuzakuthi inkunzi nganye liyilungise kanye lomnikelo wamabele ayingxenye yokuthathu etshumini lehefa yefulawa ecolekileyo exutshaniswe lamafutha; kuthi inqama ihambe lokubili etshumini;

29 kuthi-ke linye ngalinye izinyane lemvu ngalinye kwayisikhombisa, lihambe lokukodwa etshumini. 30 Akube khona lembuzi eyodwa enduna ibe ngumnikelo wesono ukuzenzela indlela yokubuyisana. 31 Lungisani lokho ndawonye leminikelo yokunathwayo, ukwengezelela eminikelweni ejwayelekileyo yokutshiswa kanye lomnikelo wawo wamabele. Nanzelelani ukuthi lezozifuyo azilasici.